KUCHING, Dis 23: Chairman Barisan Nasional Sarawak, Datuk Patinggi Abang Johari Tun Openg ngansak ketuai Parti Rakyat Bersatu (UPP) mulaika diri ngagai indu parti, iya nya Parti Sa’ati Rakyat Sarawak (SUPP).
“Nikal mih…enti kita nikal, kita nyadi kuat,” ku iya lebuh bejaku bejadi Aum Besai SUPP ditu kemari.
Ku iya, nya beguna amat laban pengawa negika parti ukai ke pemerat sereta penguntung diri.
“Kami dalam Parti Pesaka Bumiputera Bersatu (PBB) kala nengah penanggul tu dalam taun 1987.
“Kami nyadi kering pengudah parti Permas mati lalu kaban parti nya mulaika diri ngagai PBB.
Nya alai ku iya, sida di luar din patut mulaika diri ngagai parti. Ke beguna amat kitai kering sereta tegap baru, ku iya.
Presiden SUPP, Datuk Dr Sim Kui Hian sebedau tu mantaika resolusi gempuru parti sekali tu ngenggaika semua chalun terus BN, kelebih agi ba di kerusi ke endang diempu SUPP.
Ba pengawa bepilih besai ke sebedau tu, SUPP udah bediri minta pilih ba tujuh kerusi Parlimen tang semina menang ba kerusi Serian. — DayakDaily
