Jematan Btg Samarahan ulih ditengah ujung bulan tu

Datuk Seri Fadillah Yusof

KOTA SAMARAHAN, Mei 3: Menteri Kereja Raya Datuk Seri Fadillah Yusuf pechaya Jematan Batang Samarahan ulih ditengah nyerumba ujung bulan tu.

Ku iya, jematan ke beungkus RM93 juta nya deka tembu tumu agi dibanding enggau pelin asal kena Jun 22 taun tu.

“Kami dekaka jematan tu dibuka ngagai peranak ngelingi Samarahan enggau Asajaya tumu agi lalu ulih ditengah nyerumba pengerami Gawai Dayak enggau Hari Raya Aidilfitri.

“Ka mi ngarapka nadai sebarang penanggul ke tau ngachau pengawa nembuka jematan tu baka faktor gaya hari,” ku iya lebuh dikerandau pengudah Pengerami Nembuka Kereja Ke Penudi Nyambung Jambatan Batang Samarahan ba palan ngaga jematan nya ditu, lemai kemari.

Jematan nya ku iya, ukai aja ngemudahka pejalai ari Asajaya ke Samarahan, tang mantu muka kandang endur baru ari sukut ekonomi.


“Nya mega mantu perintah negeri ari aspek nambahka perengkaguna jalai tebing pantai,” ku iya.

Fadillah ke mega chalun Parlimen P194 Petra Jaya madah, bisi 11 iti jematan deka digaga dikena ngemujurka juluk ngaga Jalai Tebing Sarawak.

“Dua ari nya diatu nyauka tembu iya nya Jematan Batang Rimbas enggau Jematan Batang Samarahan.

“Dua jematan bukai iya nya Jematan Batang Lupar enggau Jematan Batang Igan diatu benung digaga lalu Jematan Batang Rambungan mengkang dalam proses ke penudi tinda.

Jalai tebing pantai ku iya, ari baruh kuasa perintah negeri lalu perintah besai semina nulung ba atur ngaga jematan aja. — DayakDaily