Jalai tebing pantai ulih nyaup ngerembaika ekonomi peranak menua pesisir

Datuk Patinggi Abang Johari Tun Openg

KUCHING, Mac 9: Jalai tebing pantai ari Sematan ke Miri ti sepenyauh 896km dipelaba tembu dalam timpuh 10 taun agi lalu ulih nyaup ngerembaika ekonomi peranak menua pesisir enggau tebing pantai.

Kepala Menteri Datuk Patinggi Abang Johari Tun Abang Openg, madahka alai alun nya deka mungkur pengawa ngaga 11 iti jematan ti deka ngelancharka aspek fizikal, ke alai perengka pengangkut daray ba pasar tebing pantai nya enda agi nguna servis feri agi, lalu ke beguna amat nadai tol.

Ku iya, empat ari jematan nya udah tembu lalu ke bukai nya dipelaba tembu dalam timpuh 5 taun agi.

Iya nganggarka ungkus ngaga 11 jematan nya urung RM 5 bilion ngena belanja ari perintah negeri enggau perjntah besai.

Nambahka nya, iya nganggarka semua ungkus dikena ngaga pemansang nya nyengkaum ngemanahka jalai tebing pantai sereta ngaga 11 iti jematan nya urung 11 bilion.


“Penanggul kami iya nya belanja dikena semua nya ke udu mar. Tang asai aku kitai ulih ngemujurka nya diatu laban kitai udah bisi bank kediri (Development Bank of Sarawak),” ku iya ba aum media pengudah bejadi Seminar Pemansang Jalai Tebing Pantai Sarawak ba sebuah hotel ditu kemari.

Dulu ari nya lebuh ke bejaku ba pengerami nya, Abang Johari madahka seminar nya deka nyadi platform dikena ngulihka penemu ari mayuh bengkah ejensi dikena nentuka pemansang ba kandang menua tebing pantai ulih mansang sebaka enggau kandang mengeri.

Ku iya, jalai nya deka nyadi Jalai Kedua nambahka Pan Borneo Highway (PBH), ke lalu nyadi siti ari pengawa perintah ngelangkar stratergi ke manah agi ungkup kandang menua ba tebing pantai.

Sama bisi nglu pengerami nya Sapit Kepala Menteri Tan Sri James Masing, Menteri Muda Jalai Tebing Pantai Sarawak Datuk Julaihi Narawi enggau Menteri Ngintu Pengelantang Pendiau, Pengelantang Komuniti, Orang Indu enggau Pemansang Anak Mit Sarawak, Datuk Seri Fatimah Abdullah. — DayakDaily