Isu imigresen meraka Brunei dipelaba teputar sebedau taun baru

Datuk Seri Najib Tun Razak

BANDAR SERI BEGAWAN, Nov 24: Isu imigresen ke bekaul jalai Pan Borneo Highway ke meraka Brunei, dipelaba ulih diputar sebedau randau ninting taun Ketuai Malaysia-Brunei taun baru.

Menteri Besai Datuk Seri Najib Tun Razak madah lebuh ke betemu enggau Sultan Brunei Sultan Hassanal Bolkiah beserimbai enggau randau ninting taun ketuai ke-21 Malaysia-Brunei, perambu Malaysia numbuhka jalai baru ari Bandar Seri Begawan ke Limbang di Malaysia, diterima manah Sultan.

Iya mega minta Sultan Brunei ngemendarka proses ngechop pasport sepenyuah tujuh kali ungkup siti pejalai meraka Brunei diatu, dikurang ngagai semina sekali chop maya tama lalu sekali agi maya pansut.

Ku iya, Malaysia mega meri langgur penemu ngambika siti sistem ti mudah dikemansang kelimpah nyaga pengelikun dikena ngemudahka pejalai rayat entara kedua-dua menua, lalu ba awak ke sama disikap enggau pekara pengelikun ke patut.

“Perkara tu udah lama dikerandau ke alai kedua-dua piak setuju ngambika nya meseti diputar sebedau randau ninting taun ketuai nangkanka tu ila,” ku iya ba aum media pengudah duduk berandau enggau Sultan Hassanal Bolkiah ditu lemai kemari.

Najib mega madah, enti Pan Borneo Highway tu udah tembu ila timpuh pejalai disadang ulih dipandakka ngagai setengah ari timpuh ke diatu.

“Nya meh empas ari pemansang Pan Borneo Highway nya ila,” ku iya. — DayakDaily