SIBU, Jan 6: Kepala Polis Pelilih Sibu ACP Zailanni Amit madah, indeks pengawa jai di Sibu nurun 46 kes tauka 5.74 peratus ba taun 2017 dibanding enggau timpuh ke sama ba taun 2016.
Bejaku ba Gempuru Beserimbai enggau Besilih Kepala Polis Pelilih Sibu di Padang Kawad Indu Opis Polis Pelilih (IPD) Sibu, Zailanni madahka polis udah ngetanka 23 iku ari baruh POCA dikena mutarka isu orang ti enda nemu badu ngereja pengawa jai.
Berebak enggau nya ku iya, Bagi Nasat Pengawa Jai Narkotik Pelilih Sibu mujur ngetanka suspek ke bisi kaul enggau bemacham penyalah dadah semanjai taun 2017.
Tu nyengkaum penyalah mekal sereta ngembuan dadah sintetik enggau ganja sereta nyadung enggau salah guna dadah.
Zailanni ngenataika pengaga ati ba pemujur raban polis nurunka penyampau kes pengawa jai di Sibu.
Ba pengerami nya, Zailanni mega bisi nyuaka setipikit pengaga ati ngagai semua pemesai enggau kaban ke bepangkat bukai ari mayuh bengkah bagi pengawa di bagi menua Sibu.
Tugas Zailanni diambi Sapit Kepala Polis Pelilih Miri Superintendan Stanley Jonathan Ringgit.
Zailanni pindah ke Kuching mangku pengawa nyadi Sapit Ketuai Opis Nasat sereta Nyeliah Pengawa Jai enggau Pengelikun Komuniti Kontinjen Sarawak. — DayakDaily
