IKS deka ditegap enda ngira bansa enggau jalai pengarap

Business, jobs and trade. — DayakDaily.com file pic. // Photo: Pixabay

BACHOK, Julai 14: Opis Menteri Pemansang Irang Dagang merambu negapka Usahawan Industri Mit enggau Jelan Pemesai (IKS) ngambika pengemeran nya enda ngira bansa enggau jalai pengarap ulih besemekih ba renggat global.

Sapit Menteri nya, Dr Mohd Hatta Ramli madahka diatu sida benung nganti ejensi perintah ke bekaul ke ari baruh lapan opis menteri perintah ke sebedau tu, diengkah baru ari baruh opis menteri nya ngambika ulih bejalaika pengawa enggau penuh.

“Antara ejensi nya baka Majlis Amanah Rakyat (Mara), Amanah Ikhtiar Malaysia, Tekun Nasional enggau Bank Rakyat ti deka diputuska Kabinet ba awak ke semak,” ku iya madah ngagai pemberita pengudah ngulu Pengerami Hari Raya Aidilfitri Amanah di Kemasin ditu kemari.

Ku Mohd Hatta, sebedau tu Opis Menteri Pemansang Orang Dagang udah dipadam ba taun 2009 ti ngujungka sekeda ejensi ke bekaul diengkah ba baruh bemacham opis menteri lalu Perintah Pakatan Harapan ngasaika nya meseti diputar lalu diengkah ba baruh siti opis menteri.

Ku iya, diatu perintah deka fokus ngagai pengemeran IKS ke diengkah ari baruh kategori B40 enggau M40, lalu perintah deka mantu nyema sida kurang puku dikena ngerembaika dagang nyentuk ke sida nyadi orang dagang ke mujur. — DayakDaily