BETONG, Okt 29: Beserimbai enģgau pengawa bejadi Hari Belia Renggat Negeri kemari, Kepala Menteri Datuk Patinggi Abang Johari Tun Openg madah Betong dipilih nyadi palan ketiga endur numbuhka Hub Inovasi Digital di negeri tu.
Ku iya, hab nya beguna amat dikena nyukung Sarawak nyingkang ke mua nengah teknologi engineering.
“Kitai udah numbuhka Hub Inovasi di Kuching enggau Sarikei lalu hab inovasi ketiga ditumbuh di Betong,” kata iya lebuh ke bejadi pengerami nya ke diatur ba Sewan Datuk Amar Stephen Kalong Ningkan ditu.
Pengerami nya udah digulu urung 5,000 iku raban nembiak.
Ku iya, kuing menua jemah ila bepanggai ba raban nembiak, nya alai iya ngansak raban nembiak nguna media baru dikena ngemansangka diri.
Ku Abang Jo, hah nya ila ulih endur ngansah pengelandik enggau penyikar raban nembiak kelebih agi ti diau di menua pesisir.
Nya setipak enggau ekonomi digital ke alai iya deka ke raban nembiak ngerebut peluang sereta semampai regas nengah aktiviti lumba enggau main, adat enggau main sereta ke bukai.
Abang Johari mega ngarapka raban nembiak beambi ulih nguna teknologi ke diatu dikena ngemujur pengawa dagang enggau pemansut.
Ba awak nya mega, iya ngenataika pengaga ati diri meda sukung ke chukup manah ari raban nembiak.
Ba pengerami nya, beratika pengawa nyuaka Anugerah Belia Negeri Sarawak enggau Anugerah Gerempung Belia Negeri Sarawak.
Sama bisi datai ngagai pengerami nya bini Kepala Menteri Datin Patinggi Dato Juma’ani Bujang, Sapit Kepala Menteri Datuk Amar Douglas Uggah Embas enggai bini iya, Penyanding Penemu Sains enggau Pansik Sarawak Datuk Patinggi Alfred Jabu enggau bini iya, Menteri Dagang Temuai, Art, Main Asal Nembiak Lumba enggau Main Datuk Abdul Karim Rahman Hamzah enggau bini, Menteri Muda Nembiak Lumba enggau Man Datuk Snowdan Lawan enggau bini, bala ketuai raban bansa enggau bala ketuai opis perintah ti dibasa sereta ke bukai. — DayakDaily
