Hari Easter 2019, mai pengarap baru peranak Lubok Antu

Jugah (lima kiba) begulai enggau raban Grija St Philip ngempat kek genap 170 taun Grija Anglika di Borneo.

Dikarang Chris Bishop

KUCHING, April 22: Kaban Parlimen (MP) Lubok Antu Jugah Muyang keran mantupka pinta rayat Lubok Antu ti dekaka pemansang pelilih nya seikas enggau pelilih bukai di Sarawak ke udah dulu mansang.

Ku Jugah, pinta ba pekara pemansang infrastruktur, kualiti pelajar enggau pemaik peranak Lubok Antu dulu dikemerat lalu deka dibantaika iya ba aum Dewan Rakyat.

“Pansik Profesor Madya Madeline Berma ke mega siku pemansik politik nusuika ngagai kitai pekara ke amat nyadi di menua pesisir.

“Ari 10 pelilih menua ke pemadu seranta di Malaysia, 7 diarika Sarawak alai Lubok Antu siti ari rintai 7 pelilih menua nya.

“Nengah runding ke positif, aku ngakun penerang nya sigi amat alai kitai berasai sinu ketegal majoriti peranak Lubok Antu bansa Iban,” ku iya.

Jugah mansutka jaku nya ba pengerami ngintu Hari Easter di Gerija ST Philip, Lubok Antu kena Hari Minggu tu tadi.

Berindik enggau nya, iya matak peranak Lubok Antu enda ngira Iban, Melayu tauka Cina sama bela berunding jauh lalu nusun pengawa ti ulih mansutka pelilih nya ari rintai statistik 10 pelilih ke pemadu seranta di Malaysia.

“Kitai meseti nusun program pemansang ke besai agi, aku ngansak semua enda ngira idealogi politik sama bela begempung sereta ngadu kerejasama ngemujur program pemansang di Lubok Antu.

“Pekara tu berat ngambika pelilih tu ulih pansut ari rintai statistik 10 pelilih ke pemadu seranta di Malaysia,” ku iya.

Ngenang sentang pengerami sehari nya, Jugah madah Easter seruran meri semengat ngagai semua ngambika enda mudah putus pengarap.

Pelilih Lubok Antu ku Jugah udah kala ngasaika pemerinsa, tang rayat meseti angkat negika pengarap baru alai pemansang deka datai lalu ngangkatka ikas pengidup rayat.

Pengerami ngintu Hari Easter ke mega nyadi pengerami ngintu genap 170 taun gerija Anglika di Borneo nya digulu lebih 200 iku peranak Lubok Antu ke diau besemak enggau Gerija St Philip.

Ba pengerami nya, Jugah bisi nyuaka geran penyampau RM40,000 ungkup Gerija St Philip, ‘LayReader Fellowship’ RM20,000 enggau ‘Main Fellowship’ RM5,000.

Kelimpah ari nya Gerija St Micheal Engkelili mega nerima penyampau ke sama RM40,000 ari Jugah. — DayakDaily