KUCHING, 22 NOV: Perintah Sarawak udah ngemendar Prujek Jalai Ulu Paku di Batu Lintang, Sri Aman nengah ungkus RM32 juta.
Menteri Muda Pengelantang Komuniti Datuk Francis Harden Hollis madah, prujek nya mungkur pengawa ngaga jematan konkrit sereta parit.
“Nengah projek Perintah Gabungan Parti Sarawak (GPS) tu, mayuh kandang menua di seberai sungai ulih dikemansang jemah ila.
“Mayuh jematan konkrit sereta jematan gantung deka digaga di kandang endur Batu Lintang, Undop nengah prujek nya,” ku Harden.
Iya mansutka jaku nya ba Program Gutung-Ruyung enggau Kimpin Pemeresi di Taman Sri Jaya di Sri Aman seharitu.
Berindik enggau nya, Harden ke mega ADUN Simanggang nyangkal tuduh raban penyakal ti madah GPS nadai mai pemansang ngagai rayat.
Ku iya, juluk penyakal ke endar iya nya deka ngasut sereta nusut runding rayat ngambika sida begedika GPS.
“Diatu Perintah GPS udah ngereja prujek ke dikinsil perintah besai ke dulu iya nya Pakatan Harapan (PH).
“Sida(PH) enda ngamatka semaya, kelimpah ti nuduh Sarawak deka bankrap dalam timpuh 3 taun ti deka datai.
“Tang, Sarawak ti betuaika Kepala Menteri Datuk Patinggi Abang Johari Tun Openg bisi pelin ekonomi ke manah dikena ngemansang negeri tu,” tambah Harden.
Ba program nya, Harden bisi ngagihkan RM20,000 ngagai Gerempung Pengelikun enggau Pemansang (JKKK) Taman Sri Jaya. — DayakDaily
