MIRI, Ogos 20: Rayat Sarawak tau bepanggai ba Gabungan Parti Sarawak (GPS) ngintu hak enggau pekara dikemerat Sarawak laban gempung nya mereti agi ke pengingin sida.
GPS ngembuan pengingin deka nentuka pemansang Negeri Sarawak, ku Sapit Kepala Menteri, Datuk Amar Douglas Uggah Embas.
Ku iya, pengudah nengah bemacham pemar sebedau tu, pilih ke pemadu manah iya nya numbuhka GPS ngambika bala ketuai ulih ngintu hak enggau pekara dikemeratka Sarawak.
GPS ke ditumbuh pengudah pengawa bepilih besai ke-14 disererai Parti Pesaka Bumiputera Bersatu (PBB), Parti Rakyat Bersatu Sarawak (SUPP), Parti Rakyat Sarawak (PRS) enggau Parti Demokratik Progresif (PDP).
Lebuh ke bejaku ba sebengkah pengerami di SK Lambir kemari, Uggah minta rayat meseti nentuka Sarawak terus mansang sereta beserakup ngambika semua aset enggau pengeraja asal Sarawak meri pemaik ngagai rayat negeri tu.
Ku iya, kenyau ari iya ngiring Sarawak, Kepala Menteri Datuk Patinggi Abang Johari Tun Openg udah ngemendarka projek ke beungkus RM5.5 bilion di negeri tu kelebih agi di menua pesisir.
Uggah meri jaminan, perintah negeri ari baruh pegai GPS deka terus mai pemansang kelebih agi ngagai rayat di menua pesisir. — DayakDaily
