GPS meri bantu pemakai ngagai 17 rumah panjai ke tasah bah di Engkilili

Tr Dandi(tiga ari kiba) nyuaka bantu ngagai sekeda ari wakil ari 17 buah rumah panjai ke tasah bah bedau lama tu tadi.

KUCHING, 23 JAN: Peranak di 17 buah rumah panjai dalam Sitak Kunsil Negeri(DUN) Engkilili ti dituntung penusah bah bedau lama tu tadi nerima bantu ari gerempung ke di baruh Gabungan Parti Sarawak(GPS) betuaika Tr Dandi Timbang.

Inisiatif program bantu bekal pemakai dipunka Desmond Sateng Sanjan lalu mungkur 314 ruang bilik ari 17 buah rumah panjai nya.

“Barang ti diagih ngagai semua ruang bilik mansa bah di 17 buah rumah panjai nyengkaum berau, minyak kena nyumai, mi segera, ai irup sereta pemakai kering ke bukai.

“Bekal pemakai tu asil pemeri Palan Servis Parti Rakyat Bersatu Sarawak(SUPP) pampang Engkilili enggau Pertubuhan Meninggikan Akhlak(PMA) Che Chuan Khor Simanggang,” Ku Tr Dandi.

Ba kaul ke sama, Desmond ngarap bantu nya ulih ngelempungka pemar ke ditapi sida ke tasah ketegal penusah bah.


Lapan ari 17 buah rumah panjang ti kena tuntung penusah bah iya nya Rumah Tenggak, Basi Ili, Rumah Sandai, Basi Ulu, Rumah Jagal, Tekalong Ulu, Rumah Harry, Tekalong Asal, Rumah Morris, Pedalai, Rumah Imau, Tanjung, Rumah Kujat Tandang, Ijok, Rumah Keneddy enggau Langkang Ulu.

Rumah panjai bukai ke bela tasah iya nya Rumah Ruekeith, Langkang Ili, Rumah Tambi, Tawai Ili, Rumah Majom, Tawai Tengah, Rumah Henry, Tawai, Rumah Nyambang, Tawai Asal, Rumah Tila, Pak, Rumah Lajan, Sengkabang, Rumah Panggau Sengkabang Asal enggau Rumah Ayum, Ensurai.

Ketegal ai ti niki enggau lengkas, peranak di semua rumah panjai tu enda sempat nyelamatka reta tengkira diri lalu abis ditabanka ai.

Bela datai ba pengawa nyuaka bantu Cr Rolland Kadir, Cr Randi Tata’a, Cr Ganing Chuat, Tr Keneddy Imau, Kua Jack Seng, Oyo Imang enggau Gindi Eloi.-DayakDaily