Dikarang Chris Bishop
KUCHING, 18 Mei: Peranak di genturung pendiau Samak di Ulu Undop, Sri Aman, minta bekal lektrik disambung ngagai rumah panjai sida.
Sida sekayu rumah panjai pechaya pinta nya ulih dikenatai ketegal tujuh rumah panjai bukai di Ulu Undop udah bisi bekal lektrik 24 jam.
Pinta nya dipekunsi enggau Chairman Parti Tindakan Demokratik (DAP) pampang Sri Aman, Leon Jimat Donald, ti bisi niki ngagai rumah panjai nya ensanus.
Ba penemuai nya, Leon bisi berandau sereta mendingka pemar ke ditapi sida sekayu rumah panjai.
“Ari semua lapan buah rumah panjai di Ulu Undop, semina genturung pendiau Samak aja ke bedau disedia bekal lektrik 24 jam.
“Pinta tu udah dikenatai ngagai pengari rayat Gabungan Parti Sarawak (GPS) ditu alai diatu udah tiga taun sida nganti. Rumah panjai bukai di Ulu Undop udah ngasai bekal lektrik 24 jam,” ku Leon nengah surat penerang berita kemari.
Nambahka pemerinsa sida serumah ku Leon, jalai nuju rumah panjai sida ke ba kandang endur Bukit Tiang Laju balat jai.
Leon madah sida sekayu rumah panjai bisi minta Perintah Pakatan Harapan (PH) mutarka pemar nya tang pekara ke bekaul enggau jalai alun sereta bekal lektrik dikuasa perintah negeri.
Nitihka penerang Leon, tetiap bilik genturung pendiau Samak melanja urung RM400 sebulan dikena meli minyak genset sida.
Ba penemuai nya, Leon bisi nyuaka cek (duit bantu) ari Sapit Menteri Dagang Dalam Menua enggau Pekara Bebeli Barang (KPDNHEP) Chong Chien Jen ke diterima Tuai Rumah Gunong. — DayakDaily
