KUCHING, Feb 11: Chairman Barisan Nasional(BN) Menua Datuk Seri Najib Tun Razak deka nerima sukung tegap ari Parti Pesaka Bumiputera Bersatu (PBB) maya napi Pengawa Bepilih Besai Ke-14 (PRU14).
Kelimpah ari nya, Presiden PBB ke mega Kepala Menteri Datuk Patinggi Abang Johari Tun Openg madah gempung parti dalam BN Sarawak bela deka meri sukung tegap.
“Maya pengawa bepilih ti deka datai kitai nadai pilih bukai kelimpah meri sukung ngagai Najib.
“Kitai dekaka iya mengkang nyadi Menteri Besai,” ku Abang Johari ba Gempuru Besai PBB Ke-14 ke digulu 5,000 iku deligit di Kuching kena Hari Enam tu tadi.
Abang Johari nambah, enti PBB besemaya, reti semaya nya deka nyadi nyata.
Kebuah pia ku iya ketegal raban ketuai politik Sarawak ngembuan kualiti tinggi.
“Kitai nemu bisi siku orang ke beumur 93 taun agi deka nyadi menteri besai.
“Anang irau Najib, kitai deka meri sukung ngagai nuan lalu ngarap kitai ulih meri ripot kad ke manah,” ku iya.
Nitihka penerang Abang Johari, Najib udah mayuh mantu Sarawak lalu rayat patut malas pemaik nya.
Projek Jalai Besai Pan Borneo, agih belanja RM1 Biliun kena ngemanah sekula ke udah repuk enggau RM500 juta entara sekeda agih belanja ke diberi Najib ngagai Sarawak.
Iya mega udah nemuai ke Sarawak 59 kali iya nya lebih ari menteri besai ke dulu ti udah megai kuasa pengelama 22 taun, tandu Abang Johari.
Abang Johari madahka kala gawa enggau menteri besai ke bekuasa pengelama 22 taun nya lalu ngelala bagi intan enggau kacha. — DayakDaily
