Gawai mengkang ulih diintu enggau ati ti gaga ba maya PKPB, ku Masing

Tan Sri James Masing

KUCHING, 26 MEI: Hari Gawai mengkang ulih dikerami enggau ati ti gaga tajapan diintu ba maya Perintah Tagang Pemindah Bersyarat(PKPB), ku Sapit Kepala Menteri Tan Sri James Masing.

Ku iya, perintah nagang ngabang ba maya Hari Gawai ke diterit enda ngelaban adat Iban.

Masing ke mega Menteri Infrastruktur enggau Pemansang Pelabuhan pechaya ngerami gawai begulai enggau diri sebilik deka ngerapitka agi kaul alai tetiap ruang bilik deka diberekat Petara nengah pemeri ke bisi disedia.

“Gawai Iban sereta adat Miring sebengkah pengawa individualistik alai tetiap bilik deka nyendiaka pemakai(pemeri) ngagai Petara tauka Semengat ke datai ngambi ulih ngintu pemaik sereta pengelantang ruang bilik nya.

“Bantu nya chukup spesifik, semina ungkup  pemaik ruang bilik lalu enggau kebuah pia sida dipinta nyendiaka pemeri ti patut ba maya ngintu Hari Gawai di rumah panjai,’Ku Masing nengah surat penerang berita kemari.


Berindik enggau nya, iya madah tagang ngabang ngagai bala pangan ba maya Hari Gawai taun tu sigi enda ngelaban adat Iban tang semina ngurangka pengerincah pengerami aja.

Ari pelajar iya ba Australian National University(Bagi Antropologi), Masing nerang diak Petara tauka Semengat tu begulai enggau bala mensia ngerami Hari Gawai.

Ketegal nya mega ku iya, ai tuak sereta pemakai bukai meseti bisi lebuh ngintu Hari Gawai.

“Petara ke dikangau datai maya Hari Gawai dinah enggau ai tuak sereta pemakai, sida(Petara) deka merekat ruang bilik ke ngintu gawai enggau pengelantang.

“Adat miring ke diadu tetiap kali maya Hari Gawai sigi nyadika simbol Pengerami Gawai,” ku Masing ke mega ADUN Baleh.—DayakDaily