KUALA LUMPUR, Jun 20: Perintah patut berundingka perambu ngurangka gaji besai ti dibayar ngagai direktor kompeni bekaul perintah (GLC) laban ngelama tu chara dipadu enggau gaji direktor GLC enda nitihka prosedur ke patut.
Ku Presiden Majlis Perundingan Pertubuhan Islam Malaysia (Mapim), Mohd Azmi Abdul Hamid, gaji enggau elawin ti yang kelalu tinggi tau dianggap siti skandal.
Ku iya, ubah ngenyit meseti dipejalai laban nyadi kompeni bekaul perintah, pelasar penentu gaji rabqn direktor enda ngelui tikas ke enda patut.
“Pengawa nyiri kroni nengah politik sereta nentuka gaji enggau bemacham elawin ti kelalu tinggi baka ti dibantaika dalam beberapa GLC sigi enda patut,” ku iya dalam sebengkah penerang.
“Perintah nguna duit rayat beranakka puku dalam kompeni. Nya kebuah, enda tau beambi ulihari sesekeda orang nentuka gaji ‘super’ ti mayuh ngagai Ketuai Pegawai Eksekutif (CEO) tauka raban direktor kompen,” ku iya.
“Bisi bida entara pekereja ti dibayar gaji pemadu baruh enggau direktor ke dibayar elawin pemadu tinggi dalam sebuah GLC. Nya dipeda nyadi siti atur dalam sistem kapitalis ke dipelanja atas nama perintah” ku iya.
Ku iya, enggau elawin ke bejuta ringgit setaun ungkup raban direktor, kompeni GLC nya nanggung ungkus operasi ti ngerugika perintah enggau rayat. — DayakDaily
