Fatimah: Pansik silik perambu nikika elawin kaunselar RM1,500-RM3,000

Fatimah bejaku ngagai pemberita.

Oleh Chris Bishop

KUCHING, 7 Ogos: Perambu nikika elawin bala kaunselar ngagai ikas RM1,500 nyentuk RM3,000 sebulan begunaka pansik ke silik, ku Datuk Seri Fatimah Abdullah.

Menteri Pengintu Pengelantang, Komuniti, Orang Indu enggau Pemansang Anak Mit nya madah perambu mungkur implikasyen ke besai ba pekara wang.

“Perambu tu sebengkah agi buah runding lalu meseti dikerandau ba aum kabinet ketegal ti bisi implikasyen ke besai ba pekara wang.

“Kitai mansik ari sukut implikasyen ba pekara wang sereta bengkah servis ke diberi bala kaunselar,” ku Fatimah bejaku ngagai pemberita seharitu.

Kemari, Ketuai Pemadah Parti Pesaka Bumiputera Bersatu (PBB) Datuk Idris Buang ngelalau perintah Sarawak berunding nambah gaji tauka elawin  baum raban kaunselar ngambika manah agi ari ke diterima raban kaunselar di negeri Pulau Pinang.

Idris merambu gaji tauka elawin baum nya patut manggai RM1,500 nyentuk ngagai RM3,000 sebulan.

Ngenang kaul ke sama, Fatimah madah raban kaunselar ukai orang ti gawa ari jam 8 pagi nyentuk ngagai 5 lemai alai sida semina gawa ba sekeda maya aja, nitihka kandang endur ke dipegai.

“Enti bisi aum, sida diberi elawin baum sereta elawin bukai baka elawin mindah ke menua bukai.

“Nyemaka elawin ke diberi ngagai bala ketuai bansa, perintah negeri udah nikika elawin nya ari ke dikumbai ‘duit sirih’ dulu suba.

“Atur tu ngipakka tanggungpengawa ke dikereja raban ketuai bansa,” ku Fatimah seraya madah tanggungpengawa raban kaunselar ba kandang mengeri enggau menua pesisir bisi bida.

Ba pengawa angkat sumpah mangku pengawa kaunselar ke diatur di Kuching ba minggu ke udah, Kepala Menteri Datuk Patinggi Abang Johari Tun Openg udah ngemendar elawin tetap RM300 sebulan ngagai lebih 750 iku kaunselar di Sarawak. — DayakDaily.