Fatimah nyambut manah penemuai basa KM ngagai PM empai lama

Datuk Seri Fatimah Abdullah

KUCHING, Jun 5: Menteri Pengelantang Pendiau Komuniti, Orang Indu, Ruang Bilik enggau Pemansang Nembiak Mit, Datuk Sri Fatimah Abdullah bepikir positif sentang penemuai basa Kepala Menteri Datuk Patinggi Abang Johari Tun Openg ngagai Menteri Besai Tun Dr Mahathir Mohamad empai lama udah di Putrajaya.

Fatimah madahka nya mandangka pemendar perintah negeri deka nempa kaul ke manah enggau perintah besai ti tau pulai ke pengelantang rayat Sarawak.

Fatimah ke mega ketuai Indu ngulu Pengerami Bebuka Puasa Begulai enggau Peryatim di Kompleks Kebajikan Laila Taib.

Fatimah lebuh ke bejaku ba pengerami nya meransang mayuh agi kompeni korporat sereta individu ke bekaul mantu gerempung pengasih di negeri tu.

Ku iya, ungkus bala anak patu balu ba palan pengasih baka Peryatim nya begunaka belanja besai ninting bulan.

Iya memuji laban majak mayuh individu enggau kompeni korporat datai bejalaika tanggungpengawa sosial sida ti meri pemaik ngagai raban ti begunaka nya. — DayakDaily