KUCHING, Dec 18: Ekonomi Sarawak diatu dipeda ngerembai manggai ba empat peratus, pia ku Kepala Menteri Datuk Patinggi Abang Johari Tun Openg.
Abang Johari madah, enti belanja ungkup pengawa ngemansangka infrastruktur nyengkaum jalai alun, jematan enggau LRT (Transit Aliran Ringan) sereta sektor servis nambah, nya deka ngerembaika pemansang ekonomi ngagai 6 peratus.
Iya arap endar Sarawak ekonomi Sarawak ulih ngerembai manggai ba 6 peratus nyerumba taun 2030 ila.
“Enti pemansang insfrastruktur ti begunaka timpuh urung tujuh ngagai 10 taun nya tembu, tentu nya deka ngerembaika ekonomi di negeri tu,” ku iya.
Abang Johari mega pechaya,Sarawak ulih nyapai status negeri maju nyerumba taun 2030 ila. — DayakDaily
