KUCHING, 4 SEPTEMBER: Peranak di Rumah Panjai Menyalin Baru di Betong dilalau besabar betapi enggau ‘Perintah Kawalan Pergerakan Diperketat (PKPD)’ kedua kali diteritka ba rumah panjai sida.
Berindik enggau nya, Tr Denil Ranti ,58, ngelalau sida sekayu rumah ngintu pengerai sereta pengelikun diri ari igi penyakit Covid-19.
“Bala kami serumah dilalau terus nyaga pengelikun pengerai diri lalu ngasika SOP ti udah ditetapka perintah dalam semua pengawa ti dikereja ninting hari kelebih agi dalam kandang timpuh PKPD ti dipejalaika diatu,” Ku Tr Denil.
PKPD keterubah udah diteritka ba Menyalin Baru berengkah 12 nyentuk ngagai 25 Mac 2021 suba.
Tajapia tandu TR Denil, serak tu sida sekayu rumah enda balat irau ba PKPS kedua tu ketegal ti udah bisi peneleba ba PKPD ti keterubah.
“Tang bisi meh pemar ditapi ketegal ti enda ulih ngereja pengawa ba kebun, sekeda utai tanam abis jai tauka mati.
“Ungkup sekeda bala ti kereja begaji ari, penusah bakatu balat amat ngeruga penatai belanja sida.
“Nya meh kebuah aku ngelalau kami serumah anang ngambi mudah ba senentang pengerai lalu sama bela besampi minta penusah Covid-19 badu ngerekai,” ku iya.
Ba kaul ke sama, Tr Denil meri besai terima kasih ngagai bantu barang pemakai ti diberi raban bekaul baka bantu ari Opis Pengintu Pengelantang Pendiau Raban Bansa (JKM) Pampang Betong.
Ku iya nandu, atur nagang orang luar tama ngagai kandang rumah panjai sida diatu mengkang dipejalaika baka selama.
Rumah panjai Menyalin Baru bisi 24 pintu bilik nyengkaum sida ti diau kediri diasuh bepekul sepengelama dua minggu berengkah 2 nyentuk ngagai 16 September 2021. — DayakDaily.
