KUALA LUMPUR, Dis 9: Senator Datuk Dr Sim Kui Hian madah, “Enti nadai Malaya, nadai Malaysia. Nadai Sarawak nadai Malaysia. Nadai Sabah nadai Malaysia.”
Ku iya, asal penumbuh Malaysia ukai deka ngubah Sabah ari Sarawak daripada perintah koloni British ngagai perintah koloni Malaya, tang bekunsika pemansang infrastruktur, pengereja pengawa, bebagika kuasa merintah enggau pengaya ti nadai bechiping.
Ku iya bejaku ba Dewan Negara may bejuraika Rang Undang-Undang Perbekalan 2018,. Ku Dr Sim baru, Sempekat Malaysia (MA63) ke suah diaebut iya ba Dewan Negara siti sempekat antarabansa “lalu nyentuk ke diatu agi bisi ba PBB” ti disain Perintah United Kingdom, Malaya, Singapura, Sarawak enggau Sabah; ukai perintah Pulau Pinang tauka Perintah Negeri bukai.
“Reti MA63 nya sebengkah sempekat ti sah,” ku iya nyemetak.
“Kenyau ari kelia, sekalika kita nemu tauka enda, hak Sarawak majak punas nyengkaum undang-undang “Continental Shelf Act 1966”, “Petroleum Act 1974” enggau “Territorial Sea Act 2012”. Semua undang-undang nya ukai dikemendarka Parlimen Malaysia enti enda dipesetuju DUN Sarawak enggau DUN Sabah,” ku iya.
“Nyadi rayat Sarawak aku mega deka ngenataika pengaga ati ngagai Menteri Besai ti semampai mendingka sada Perintah Negeri Sarawak bekaul pengwa nyerenih baru MA 63 kelebih agi ba pekara ngenegapka kaul entara menua di Malaysia,” ku iya.
“Nengah awak tu mega aku deka meri terima kasih ngagai Perintah Besai ke ari baruh iring Menteri Besai Najib ke udah merj sukung ngagai aspirasi Rayat Sabah enggau Sarawak ba MA 63 maya Hari Malayaia 2017 di Kinabalu ti madahka “utai ke patut nyadi sarawak enggau Sabah ari baruh MA 63, deka dipulaika” ku iya. — DayakDaily
