Dayak “CM” semina diguna kena nyapai juluk politik

Bobby William

KUCHING, 23 DIS: Tuduh bala ketuai penyakal ti dekaka pangku pengawa ketuai menteri(CM) diarika bansa Dayak semina dikena ngulih ka juluk politik aja.

Presiden Parti Bansa Dayak Sarawak(PBDS) Bobby William madah semina PBDS aja ti ngembuan pengeran dekaka Dayak nyadi CM.

Bobby nimbal tuduh Ketuai Parti Tindakan Demokratik(DAP) Chong Chieng Jen sereta Ketuai Parti Keadilan Rakyat(PKR) Larry Sng ba sentang
pekara nya.

“Enti nyema CM ke dipadu munyi ku penemu seduai, nya semina dikena nyapai sempekat politik aja.

“Enti PBDS bejalaika prujek CM, nya baru dipeda tulin laban orang ti dipadu nyadi CM deka ngarika parti Dayak enggau Bansa Dayak,’ku iya nengah surat penerang berita seharitu.

Beserimbai enggau nya tambah Bobby, PBDS udah chukup besedia berandau enggau Presiden PKR Datuk Seri Anwar Ibrahim enti sida begunaka
sukung.

Ku iya, Anwar patut nemu sereta ngelala ba Sarawak bisi PBDS, lalu enti PKR tauka Pakatan Harapan(PH) enda mujur sida patut nemu sapa
kaling ti betul.

“Nya alai, sekali agi aku nyebut, enti jaku tu dikeamatka semina pengari PBDS aja CM ti tulin, aku nadai penanggul betemu enggau Anwar nyema enti iya deka berandau enggau PBDS.

“Tang enti iya ngasai ka PKR sereta PH Sarawak chukup pengering, nya tepulai ba iya empu.

“Ba simpul penemu aku, PH Sarawak enda ulih ngalahka Gabungan Parti Sarawak(GPS) enti sida enda ngaul parti lokal kelebih agi PBDS ba
pengawa bepilih ti deka datai,’ku Bobby nandu.-DayakDaily