KUCHING, Apr 4: Gerempung Graduet Dayak Sarawak(SDGA) nesau bala diau di rumah panjai mesetika beratika jaku lalau ti dipansutka Opis Menteri Pengerai Malaysia(KKM) ba maya napi pengerekai Covid-19 maya ke diatu.
Sapit Presiden SDGA Dr Jawing Chunggat madah, bala mayuh meseti ngemerankan ‘sosial distancing’, iya nya nentuka takah ari pangan diri ngelui 1 meter.
“Enda iboh begulai bebala mayuh ba ruai rumah panjai. Enti deka berandau ba ruai, duduk jauh ari pangan diri.
“Anang bekunsika cangkir tauka sudu lebuh maya tu ketegal igi penyakit Covid-19 ulih ngerampit ari ai liur,” ku iya nengah surat penerang berita.
Nangkanka nya, Dr Jawing mega minta sapa-sapa ti bisi pulai ke rumah panjai dalam timpoh Atur NagangPemindah (PKP) tu meseti enda tau mindah ari rumah panjai nya.
Ku iya nambah, peranak rumah panjai mega ditagang ngereja pengawa rama baka besukan tauka ngatur pengerami.
“Tu ngambika kitai ulih ngemunaska igi penyakit Covid-19 ari majak ngerekai lalu majak ngerampit mensia mayuh.
“Igi penyakit tu diau ba tubuh kitai mensia enda milih tikas umur, biak tauka tuai lalu jampat ngerampit ngagai orang bukai ari batuk, engkasi, berinsak, ai liur enggau bepegai,” ku iya.
Tambah Dr Jawing, igi penyakit Covid-19 agi ulih diau ba kandang endur ke dipegai kitai lalu ngerampit orang bukai.
Ketegal nya ku iya, tetiap iku kitai meseti nyekatka pejalai enggau kaul kitai ngambika igi penyakit nya alu punas.
Iya ngelalau sapa-sapa ti bisi nurun ngalu ke pasar bebelika lauk enggau perengka dapur alu jampat ngintu pemeresi diri sepengudah pulai ke rumah.
“Meseti jampat nganjung diri mandi enggau sabun sepengudah datai di rumah.
“Anang guai ngaul bala orang bukai kelebih agi sida ke tuai tauka anak mit.
“Enti bisi ngembuan tanda sakit Covid-19 baka ke renga, batuk, berinsak tauka sendat seput, tau nganjung diri berubat ba klinik ti semak,” tesau Dr Jawing.
Nitihka penerang Dr Jawing, penyakit tu ditemu tau ngasuh bebadi kelebih agi ba orang ti berumur ngelui 60 taun sereta ba orang ti bisi ngundan penyakit bukai baka tinggi darah, kemi manis, sakit tungkul ati tauka sakit lempuang. —DayakDaily
