Dikarang Chris Bishop
KUCHING, 12 Ogos: Nadai kes positif baru Covid-19 dirikud seharitu, Pelilih Kuching enggau Serian betukar status ari kuning ngagai hijau.
Enggau nya, Komiti Penusah Ngenyit Negeri Sarawak (JPBNS) madah semua pelilih menua di Sarawak ba status hijau.
“Pelilih Kuching enggau Serian udah betukar status ari kuning ngagai hijau pengudah kededua pelilih nadai ngerikud kes positif dalam menua ba timpuh 14 hari ke udah.
“Retinya, semua pelilih menua di Sarawak ba status hijau,” ku JPBNS nengah siti surat penerang berita seharitu.
Pelilih Samarahan enggau Lundu udah betukar ari status kuning ngagai hijau kemari.
JPBNS mega madah penyampau semua kes positif Covid-19 mengkang 681 alai bisi 10 kluster Covid-19 ti mengkang aktif di Sarawak naka ke
diatu.
“Kluster ti mengkang aktif di Sarawak iya nya Kluster Syarikat Kejuruteraaan (8 kes), Kluster Mambong (7 kes), Kluster Pusat Perubatan (3 kes), Kluster Jupiter(3 kes), Kluster Pasar Stutong (7 kes), dan Kluster Jeti Kuching (2 kes).
“Kluster bukai iya nya Kluster Sentosa (31 kes), Kluster PUI Melbourne (3 kes), Kluster Syarikat Pembinaan Kuching (2 kes) enggau
Kluster Pasar Satok (4 kes),” ku JPBNS.
Penerang nya mega madah seharitu nadai kes baru udah gerai lalu dikemendar pansut ari spital.
Enggau nya, penyampau kes positif Covid-19 ti udah gerai sereta dikemendar pansut ari spital mengkang 659 iku tauka 96.77 peratus ari
penyampau semua kes.
“Bisi 3 iku mengkang diperubat ba wad isolasyen spital alai penyampau kes mati mengkang 19 iku. — DayakDaily
