Dikarang Chris Bishop
KUCHING, 15 OGOS: Sarawak seharitu nadai ngerikud kes positif baru Covid-19 sereta Kluster Perubatan Kuching ditutup.
Komiti Pengintu Penusah Ngenyit Negeri Sarawak(JPBNS) nengah surat penerang berita madah, penyampau semua kes positif Covid-19 mengkang 682.
Kluster Perubatan Kuching ditutup pengudah nadai kes baru dirikud dalam timpuh 28 hari ari kes ke penudi kluster nya.
“Kluster tu dibuka kena 17 Julai 2020 ti mungkur siti palan berubat di Kuching.
“Kluster tu mungkur tiga iku kes iya nya kes 582, 593 enggau 614 ti disah makmal ari penyampau 101 iku ti udah diperesa.
“Ketetiga kes ngarika peranak menua ke beumur 29 enggau 30 alai semina siti kes aja ke bisi ngayanka tanda dirampit Covid-19,” ku penerangnya.
JPBNS madah, kes penudi gerai sereta dikemendar pansut spital ari kluster tu iya nya kena 2 Ogos 2020 alai nadai pemati dirikut.
Kluster Perubatan Kuching mujur diintu dalam timpuh 14 hari ari maya kluster nya dibuka.
JPBNS mega madah, bisi 8 kluster Covid-19 mengkang aktif di Sarawak naka ke diatu lalu nya mungkur 64 kes.
“Kluster ti mengkang aktif di Sarawak iya nya Kluster Syarikat Kejuruteraaan (8 kes), Kluster Mambong (7 kes), Kluster Pasar Stutong (7 kes), Kluster Jeti Kuching (2 kes).
“Kluster bukai iya nya Kluster Sentosa (31 kes), Kluster PUI Melbourne (3 kes), Kluster Syarikat Pembinaan Kuching (2 kes) enggau Kluster Pasar Satok (4 kes),”ku JPBNS.
Nadai kes bisi dirikud gerai seharitu alai penyampau kes positif Covid-19 ti udah gerai sereta dikemendar pansut ari spital manggai 659 iku tauka 96.33 peratus ari penyampau semua kes.
“Bisi 4 iku mengkang diperubat ba wad isolasyen spital alai penyampau kes mati mengkang 19 iku,” ku JPBNS.-DayakDaily
