Covid-19: Nadai kes positif baru di Sarawak

Kes Covid-19 dirikut di Sarawak seharitu, 3 Ogos 2020. Ari Komiti Pengintu Penusah Ngenyit Negeri Sarawak (JPBNS).

KUCHING, 3 Ogos: Nadai kes baru positif Covid-19 dirikut di Sarawak seharitu ngujungka penyampau semua kes mengkang 678 kes.

Komiti Pengintu Penusah Ngenyit Negeri Sarawak (JPBNS) nengah siti penerang berita madah, 5 kes positif Covid-19 udah gerai lalu dikemendar pansut ari Spital Besai Sarawak (SGH) seharitu.

“Berindik enggau nya, penyampau semua kes positif ke udah gerai lalu dikemendar pansut ari spital manggai 599 iku tauka 88.35 peratus ari penyampau semua kes.

“Penyampau 10 iku mengkang diperubat dalam wad isolasyen lalu penyampau kes mati mengkang 19 iku tauka 2.8 peratus,” ku JPBNS.

Nitihka penerang nya, seharitu mega bisi 25 kes baru orang ke dipelaba (PUI) bisi diriput alai penyampau 451 iku orang ke dipantau (PUS) benung dikuarantin ba hotel.


Lima pelilih menua iya nya Kuching, Serian, Lundu, Bau enggau Samarahan mengkang ba status kuning alai pelilih bukai mengkang ngenanka status hijau.

JPBNS mega madahka bisi kluster mengkang aktif di Sarawak iya nya Kluster Syarikat Kejuruteraan (8 kes), Kluster Mambong (7 kes), Kluster Pusat Perubatan (3 kes), Kluster Jupiter (3 kes) dan Kluster Pasar Stutong (7 kes), Kluster Jeti Kuching (2 kes), Kluster Sentosa (31 kes), Kluster PUI Melbourne (3 kes), Kluster Syarikat Pembinaan (2 kes) enggau Kluster Pasar Satok (4 kes).-DayakDaily