Covid-19: Miri ngerikud 1 kes positif baru, Kluster Syarikat Pembinaan Kuching tutup

Image by Alexey Hulsov from Pixabay

Dikarang Chris Bishop

KUCHING, 22 OGOS: Sarawak seharitu ngerikud siti kes positif baru Covid-19, ku Komiti Pengintu Penusah Ngenyit Negeri Sarawak(JPBNS).

JPBNS nengah siti surat penerang madah, kes positif baru nya diriput di Pelilih Miri lalu ngujungka penyampau semua kes positif Covid-19 di negeri tu manggai 688.

“Kes ke-688 tu siku lelaki peranak negeri beumur 55 tahun ke baru pulai ari Amsterdam, Belanda. Iya gawa nyadi scaffolder offshore di Amsterdam.

“Sejarah pejalai ngayanka kes nepan bilun ari Amsterdam kena 14 Ogos ti transit ba Doha sebedau nampung penerbai ke Kuala Lumpur nengah Padang Bilun Antarabangsa Kuala Lumpur(KLIA) lalu sangkai di Malaysia kena 15 Ogos.


“Kes bemalam semalam di Kuala Lumpur sebedau pulai ke Miri kena 16 Ogos nengah Padang Bilun Miri. Sangkai di Miri, kes terus dibai ke palan kuarantin hotel,” ku JPBNS.

Surat penerang nya madah, maya di kuarantin, kes diambi swab ungkup peresa rT-PCR keterubah kena 18 Ogos alai pemutus peresa makmal kena 21 Ogos mandangka kes positif Covid-19.

JPBNS nambah, kes udah dipasukka ke Spital Miri ba hari ke sama lalu kes ditetapka siti kes import ari menua luar.

Ngenang kaul ke sama, JPBNS madah Kluster Syarikat Pembinaan Kuching ditutup pengudah nadai kes baru diriput dalam timpuh 28 hari ari kes ke penudi.

“Kluster Syarikat Pembinaan Kuching ditemu kena 25 Julai 2020 lalu mungkur 2 kes positif ti udah disahka makmal,” ku JPBNS.

JPBNS mega madah 6 kluster mengkang aktif di Sarawak ti mungkur 57 kes.

Kluster aktif iya nya Kluster Syarikat Kejuruteraan(8 kes), Kluster Mambong (7 kes), Kluster Sentosa (31 kes), Kluster PUI Melbourne (3 kes),Kluster Pasar Satok (4 kes) enggau Kluster Seri Alam Bintulu (4 kes).

Penerang nya mega madah seharitu 1 kes baru udah gerai lalu dikemendar pansut ari spital.

“Enggau nya, penyampau kes positif Covid-19 ti udah gerai sereta dikemendar pansut ari spital mengkang 662 iku tauka 96.22 peratus ari penyampau semua kes.

“Bisi 7 iku mengkang diperubat ba wad isolasyen spital alai penyampau kes mati mengkang 19 iku.—DayakDaily