KUCHING, Okt 18: Chairman Parti Keadilan Rakyat (PKR) Nengeri Baru Bian nyangkal penerang ti dipansutka Presiden Parti Bansa Dayak Sarawak Baru (PBDSB) ti madahka Presiden PKR, Datuk Seri Wan Azizah mandangka sukung ngagai Hudud, ti lalu mandangka Pakatan Harapan (PH) nyukung konsep menua Islam.
Baru ke mega Kaban Kunsil Nengeri Ba Kelalan, madah penerang ti dipansutka Cobbold sekalika nya ketegal iya enda nemu tauka bisi niat enda manah.
“Cobbold patut meresa dulu fakta sebedau iya nguji melitik mensia mayuh nengah chara ngelempaika penyalah ba orang bukai. Iya patut nemu kebuah Parti Islam SeMalaysia (PAS) ninggalka Pakatan Rakyat (PH) laban PKR tegap penemu ngelaban (RUU 355) Undang-Undang Hudud ti dibantaika Abdul Hadi Awang (MP Marang) dalam parlimen, ti empai dipejuraika.
“Datuk Seri Wan Azizah madahka sigi hak sesiku MP bejuraika undang- undang, tang tebal agi MP PKR enda nyukung RUU 355 nya nyema dipejurai tauka diundi,” ku iya nengah penerang kemari.
Ngarika PKR Sarawak, nyata nengah mayuh bengkah penerang ke udah dipansut, sida tegap penemu mantah hudud enggau ulah sekeda raban, PAS sereta UMNO ti nguji deka mali Malaysia nyadi menua Islam.
“Pengawa bepilih besai deka diatur enda lama agi, nya alai mayuh orang nguji deka enggau bediri minta pilih lalu nguji naka penyuah pansut ba media enggau ba mua mensia mayuh.
“Taja pia, ngaga penerang bula nya enda profesional lalu enda tau nyadika peransang ngagai orang politik. Aram mih sama nyeliahka politik UMNO tama ke Sarawak,” ku Baru. — DayakDaily
