KUCHING, April 24: Kepala Menteri Datuk Patinggi Abang Johari Tun Openg pechaya rintai chalun Barisan Nasional (BN) ke bediri ba PRU14 ulih menang majoriti kerusi BN.
Ku iya, ari 31 kerusi nya, 14 enggi PBB, 7 SUPP, 6 PRS, lalu 4 iti agi enggi PDP.
Ku iya baru, ari 31 iku chalun nya 15 iku orang baru.
“Bisi 25 chalun lelaki lalu 6 iku indu. Kami pechaya BN Sarawak ulih menang 29 kerusi sekali tu.
Iya mega meri terima kasih ngagai SUP enggau UPP ketegal setuju nguna siti platform napi PRU ke sekali tu.
Semua 31 chalun nya udah disarap lalu dituku Opis Penagang Makai Suap (SPRM) enggau Polis Diraja Malaysia (PDRM) nadai ngereja pengawa enda manah.
Ku Abang Johari, chalun naru ke ari raban pesonaliti biak sereta bepeneleba dipilih ngambika ulih nyaup nyikap negeri tu napi dunya digital.
Aku mega meri terima kasih ngagai penyandang kerusi laban udah meri awak ngagai chalun ke biak agi, ku iya.
Tetiap ketuai di negeri tu meseti fokus ngagai penyerakup sereta beratka anak Sarawak lalu ulih bekerejasa enggau perintah besai.
Manifesto BN Sarawak ungkup PRU14 mega berat deka nyendiaka perengkaguna ke rayat enggau inisiatif dikena ngerembaika ekonomi negeri enggau rayat. — DayakDaily
