KUCHING, April 17: Kepala Menteri Datuk Patinggi Abang Johari Tun Openg madahka diri ‘enda nemu’ lebuh ke ditanya pasal bagi chalun Barisan Nasional (BN) Sarawak ke deka bediri minta pilih ba Pengawa Bepilih Besai Ke-14 (PRU14).
Empai lama udah, Sekretari Besai BN Datuk Seri Tengku Adnan Tengku Mansor madahka rintai nama chalun senarai BN dibantaika kena tujuh tauka 10 hari sebedau hari ngantung nama chalun kena April 28.
Bisi 31 kerusi parlimen deka diperebut di Sarawak.
Empat belas kerusi diungkupka Parti Pesaka Bumiputera Bersatu (PBB), Parti Sa’ati Rakyat Sarawak (SUPP) tujuh kerusi, Parti Rakyat Sarawak (PRS) enam kerusi lalu Parti Progresif Demokratik (PDP) empat kerusi.
Ba Pengawa Bepilih Besai Ke-13 (PRU13), BN Sarawak alah enam ari 31 kerusi baka di Bandar Kuching, Stampin, Sarikei, Sibu, Lanang enggau Miri.
Abang Johari sebedau tu madah, iya pechaya BN Sarawak ulih ngetanka kerusi ti dimenang kelimpah ngambi pulai tiga kerusi ari penyakal. — DayakDaily
