Chris Bishop
KUCHING, Mac 19: Universiti Teknologi Mara (UiTM) pampang Sarawak seharitu ngatur penemuai basa ngagai Menteri Pelajar, Sains enggau Pansik Teknologi(MESTR) Dato Sri Michael Manyin Jaong di Begunan Baitul Makmur ditu.
Seraban 9 iku pemesai UiTM pampang Sarawak nya diuluka Sapit Reaktor Pekara Akademik enggau Antarabangsa, Prof Madya Dr Firdaus Abdullah.
Ba penemuai nya, Dr Firdaus bisi nyuaka bup ‘Indeks Pengukuran Nilai Kendiri'(I-KEN), iya nya siti bup ari asil pansik ke diadu ba nembiak sekula sekundari di Sarawak.
Pansik nya dipelanja MESTR alai I-KEN nyadi siti chara dikena nentuka risiko ba nembiak ke bisi napi penusah tauka delinkuen.
Tim pemansik tu betuaika Koordinator Unit Pemansik Dr Azilawati Banchit enggau raban lecturer UiTM Sarawak iya nya Puteri Faida Alya Zainuddin enggau Chen Chee Khium sereta siku lecturer Unimas, Dr Merikan Aren.
Ba pengujung randau nya, Dr Firdaus bisi nyuaka surat, minta Manyin bejadi Aum Antarabangsa Kedua Sentang Komputer enggau Aplikasyen Drone (IConDA) 2019.
Aum tu deka diatur berengkah 19 nyentuk ngagai Disember 21, 2019 alai lebih 300 penyereta ari dalam enggau luar menua disadang datai. — DayakDaily
