BSH renggat ketiga deka dibayar berengkah ari 15 Ogos

Lim Guan Eng

KUALA LUMPUR, Ogos 4: Bayar renggat ketiga Bantu Penyanding Idup (BSH) 2018 deka berenkah dibayar kena 15 Ogos tu ke mungkur nyauka 4.1 juta penerima enggau anggar agih belanja sepenyampau RM1.6 bilion.

Menteri Wang Lim Guan Eng madah, bayar nya digaga dikena mantu rayat nyendiaka diri nyerumba Hari Raya Aidiladha ke dijangka disambut kena 22 Ogos.

“Bayar BSH nya deka dikredit terus ke dalam akaun penerima berengkah ari haribulan nya. Ngagai orang ti nadai lumur akaun, surat pemendar deka dipos terus ke address penerima lalu mata duit ulih diambi ba barang bagi pampang Bank Simpanan Nasional (BSN),” ku iya ba penerang media kemari.

Ku iya sebarang tanya, tau ditujuka ngagai lumur nadai tol 1-800-88-2716 tauka email ngagai  bsh@treasury.gov.my.

Ku Lim, bayar nya mega ngelaika perintah besai enda bankrap baka ke disebut, tang agi ulih meri BSH taja pan nadai agi asil Chukai Barang enggau Servis (GST).


Nemgah awak nya mega, iya madahka subsidi petrol sepenyampau RM3 bilion udah disediaka nyentuk ujung taun tu dikena negapka rega RON95 enggau diesel ba tikas RM2.20 sereta RM2.18 seliter taja pan rega minyak entarabansa udah niki 42 peratus ngagai US$74 setong dibanding anggar US$52 setong sebedau tu. — DayakDaily