KUCHING, Nov 20: Karnival Wang Sarawak ti keterubah endar diatur Bank Negara Malaysia (BNM) di negeri tu pengelama tiga hari berengkah Nov 24 deka disempulang enggau ‘Pocket Talks’ dikena nambahka penemu mensia mayuh sentang servis pekara wang enggau ngatur chara nguna belanja ke betul.
Kepala Opis BNM Kuching, Rosnani Mahamad Zain madah entara topik ke deka dikerandau maya nya baka ngatur chara nguna belanja ari Ejensi Kaunseling enggau Ngatur Kredit (AKPK), skim jampat kaya sereta ditipu ari sukut wang ari Polis Diraja Malaysia.
“Kelimpah ari nya mega diberi licha pasal perambu ungkup maya pinchin ari Kumpulan Wang Simpanan Pekerja (KWSP) enggau liberalisasi insurans kerita ari Gerempung Insurans Am Malaysia (PIAM), ku iya empai lama udah.
Karnival ti berambaika leka jaku “Utamakan Keperluan Kewangan Anda” nya deka diatur ba Palan Pemandang Cityone ari 10 pagi nyentuk 10 malam ti sadang deka dipenyadi Kepala Menteri Datuk Patinggi Abang Johari Tun Openg enggau Gabenor Bank Negara Tan Sri Muhammad Ibrahim ke mega dipelaba bisi datai maya nya ila.
Ku Rosnani, 40 institusi deka nyeretai karnival nya baka penyendia servis pekara wang, gerempung enggau ejensi perintah ti bisi mandangka mayuh bengkah produk enggau servis ba pekara wang dikena ngemantupka pinta ke bebida.
“Sekumbang tiga hari berunggu karnival nya, aktiviti ti disediaka ngagai mensia mayuh baka servis kaunseling pekara wang sereta mutarka penanggul, meresaa rikod wang sereta nyelak ripot kredit (CCRIS),jaku lalau skim tauka wang turu ke bisi ungkup PKS, IKS sereta pemadah bekaul enggau mata duit Ringgit nyengkaum pekara pengelikun,” ku iya.
Ku Rosnani, karnival nya mega drka dikerami enggau konsert mini selebriti popular baka Hafiz Suip enggau At Adau nyengkaum ratu terejun menua Pandelela Rinong sereta Maskot Si Kijang begulau enggau Didi and Friends.
“Mensia mayuh ke datai mega bisi peluang menang bemacham perais ke beungkus lebih RM150,000 nengah kuiz enggai tiket benasit begulai enggau selebriti,” ku iya.
Penerang silik pasal karnival nya tau dipeda ba website https://www.karnivalkewangan.com.my/2017/ tauka telefon ngagai BNM Opis Kuching ba lumur 082-224200. — DayakDaily
