KUCHING, Okt 17: Chairman Parti Keadilan Rakyat (PKR) Nengeri, Baru Bian madahka bala ketuai ari Sarawak, kelebih agi Barisan Nasional (BN) patut mantaika penetap runding sida bekaul enggau pengawa ti deka ngaga menua tu nyadi menua Islam.
Baru ke mega Kaban Kunsil Nengeri Ba Kelalan bejaku munyi nya nimbal penetang ti dipansutka Datuk Dr Asyraf Wajdi Dusuki, ke alai Sapit Menteri ba Opis Menteri Besai nya kena Hari Enam tu tadi diripot bisi mansutka jaku madahka perintah BN sigi semampai nguji negapka Islam belama.
“Nyata, pemadah dipansutka Wajdi betelisih enggau Sempekat Malaysia 1963,” ku iya ba sebengkah penerang kemari ngenang bakani Sabah, Sarawak, Persekutuan Tanah Melayu enggau Singapura setuju numbuhka Malaysia 54 taun ke udah.
Ku iya, Wajdi baka ke enda ibuhka pekara nya taja pan isu nya besai amat reti ba rayat Sarawak.
“Sebarang pengawa ke nguji nyadika menua tu debuah menua Islam nyata ngelaban pelasar atur Sempekat Malaysia 1963,” ku iya.
BN Sarawak patut ngenggaika pemadah dipansut Wajdi laban enti nengeri nya udah setuju numbuhka Malaysia, pelasar nya endang nguing ngagai pemereti ba runding ke alai sesebuah menua nya diiring nengah undang-undang menua, ukai undang-undang jalai pengarap. — DayakDaily
