KUCHING, April 23: Barisan Nasional (BN) Sarawak deka mantaika nama chalun kerusi Parlimen ba Pengawa Bepilih Besai Ke-14 (PRU14) ditu pagila.
Kepala Menteri Sarawak Datuk Patinggi Abang Johari Tun Openg madah endur mantaika nya diatur ba Indu Opis Parti Pesaka Bumiputera Bersatu Sarawak (PBB) di Jalai Bako ditu.
Lebuh ke ditanya sentang pemutus Parti Rayat Sarawak (PRS) ningkilka Datuk Entulu Belaun ke mega Menteri ba Opis Menteri Besai enggau Datuk William Nyallau Badak ari pangku pengawa nyadi sapit enggau mandal presiden parti, Abang Johari madahka sida bebasaka pemutus nya.
Abang Johari ke mega chairman BN negeri dikerandau pemberita pengudah ngulu pengerami graduasi Swinburne University of Technology Sarawak Campus ba Palan Konvensyen Borneo Kuching ditu.
Malam tadi, Presiden PRS madahka parti nya ningkilka penyandang kerusi Parlimen Selangah enggau Lubok Antu nya enggau tiga iku kaban Kunsil Besai parti ti dipadahka sida ngachau penyerakup dalam parti pengudah enda setuju enggau chalun ti ditetapka parti bepilih maya PRU14. — DayakDaily
