Kontraktor Bumiputera di negeri tu dilalau ngambi peluang ari projek ke digaga perintah

Datuk Patinggi Abang Johari Tun Openg

KUCHING, April 23: Kepala Menteri Datuk Patinggi Abang Johari Tun Openg madahka semua projek ti udah diperambu sereta deka digaga meri pemaik ngagai bakal kontraktor Bumiputera di negeri tu ti patut udah yang patut sedia nyertai nya.

Entara projek baka Transit Aliran Ringan (LRT) ke beungkus urung RM8 bilion, projek ngangkat manah sekula repuk ke beungkus urung RM1 bilion.

Baka nya mega projek industri minyak emggau gis, ngaga jematan enggau jalai tebing pantai ke beungkus bepuluh juta ringgit.

Kelimpah ari nya, projek ejensi perintah negeri bukai baka Sarawak Energy, Perbadanan Pembangunan Ekonomi Sarawak (SEDC), Perbadanan Kemajuan Perusahaan Kayu Sarawak (Pusaka) mega bisi nyendiaka mayuh pengawa puang.

Bejaku ba Pengerami Makai Lemai sereta Bejadi Aum Besai Ninting Taun Gerempung Kontraktor Melayu Malaysia (PKMM) Sarawak, Abang Johari ngarapka kontraktor Bumiputera di Sarawak ngerebut peluang nya.


Ku iya, projek pemansang ke diperambu perintah negeri ungkup rayat udah muka mayuh peluang enggau pengawa puang.

“Nya kebuah, kontraktor Bumiputera patut sedia sereta nyikap kompeni sida ngena pengelandik ke bekaul kelebih agi ari segi teknologi digital,” ku Abang Johari.

Abang Johari mega ngansak kontraktor Bumiputera ngerebut peluang kereja ar semua Ahli Kaban Kunsil Negeri (ADUN) Barisan Nasional (BN) di negeri tu.

Ku iya, nengah Program Transformasi Menua Pesisir (RTP), perintah nyendiaka belanja RM5 juta setaun ngagai tetiap ADUN.

Reti nya bisi RM360 juta ba jari 72 ADUN di negeri tu dikena mantu sitak sida ngemanahka jalaai alun tauka ngangkatmanah sekula dalam timpuh setaun. — DayakDaily