BN agi bekuasa ba Putrajaya pengudah PRU14 — Najib

Datuk Seri Najib Tun Razak

PENAMPANG, May 7: Menteri Besai Datuk Seri Najib Tun Razak pechaya Barisan Nasional (BN) ulih menang sereta mengkang megai kuasa di Putrajaya pengudah Pengawa Bepilih Besai ke-14 (PRU14) tu.

Ku iya, nya berindik ari sukung rayat ngagai BN ti dipadahka iya “luar biasa” nyengkaum ari Sabah enggau Sarawak.

“Aku pechaya kelebih agi nengah sukung apatah ari (rayat) Sabah enggau Sarawak sereta negeri bukai.

“Kitai tetap deka menang. Pechaya meh BN ba renggat pusat deka nyadi bakih ngagai orang Sabah,” ku iya ba pengerami ketuai begulai enggau rayat ditu malam kemari.

Najib mega madahka diri bisi perambu besai ungkup Sabah pengudah PRU14.


Menteri Besai nya mega madah, BN besemaya deka numbuhka siti unit hal ehwal khas ukai Islam ti keterubah endar diengkah ari baruh Opis Menteri Besai.

Ku iya, unit deka nyadi referan ke perintah bekaul hal ehwal rayat ukai Islam sereta enda meri penanggul ngagai rayat Islam dalam konstitusyen

Kelimpah ari nya, Najib mega nandu madahka iya sedia mulaika hak Sabah dalam Sempekat Malaysia 1963 (MA63) ke diambi perintah Besai.

Sama bisi ngulu pengerami nya Kepala Menteri Sabah Tan Sri Musa Aman, Sapit Kepala Menteri Tan Sri Joseph Pairin Kitingan enggau Pemangku Presiden UPKO Datuk Seri Wilfred Madius Tangau, ke mega Menteri Sains, Teknologi enggau Inovasi, chalun Parlimen Penampang Caeser Mandela Malakun, chalun Kunsil Negeri (DUN) Moyog Datuk Donald Peter Mojuntin enggau DUN Kapayan Datuk Francis Goh. — DayakDaily