KUALA LUMPUR, Ogos 22: Penyampau kes Penyakit Jari, Kaki enggau Mulut (HFMD) ke diriput taun tu nyentuk 18 Ogos bisi 53,156 kes.
Dalam timpuh, kes pemati ketegal HFMD sereta dirampit EV71 bisi dua iya nya siti di Sarawak lalu siti di Pulau Pinang, lalu nadai kes ke pemadu baru diriput.
Ketuai Direktor Opis Pengerai Datuk Dr Noor Hisham Abdullah ba penerang iya madahka penyampau kes ninting minggu ungkup timpuh 12 Ogos ngagai 18 Ogos mandangka penurun 1,304 kes (25.4 peratus) dibanding minggu ke sebedau nya (5 Ogos ngagai 11 Ogos) ke bisi 3,826 kes dibanding 5,130 kes.
“Semua negeri mandangka pengurang kes kelimpah di Perak, nambah 92 kes (28 peratus),” ku iya.
Beduduk ari nya, apai indai ke mai bala anak sida kemisi beserimbai enggau kemisi sekula enggau Hari Raya Aidiladha dipinta nentuka pemeresi diri enggau suda sebilik kelebih agi bala anak mit sereta nyeliahka ngagai endur ke dedat laban mensia mayuh.
Dr Noor Hisham mega ngelalau mensia mayuh ngambika enda pansut ari rumah sereta begulai enggau orang ke gerai nyema sida bisi kelai penyakit HFMD. — DayakDaily
