Bisi 51,147 penyakit HFMD dirikod di serata Malaysia

Poster mencegah penyakit tangan, kaki dan mulut (HFMD).

KUALA LUMPUR, Ogos 17: Bisi 51,147 kes penyakit jari, kaki enggau mulut (HFMD) dirikod di serata menua kenyau ari Jan 1 ngagai Ogos 14, pia ku Dewan Rakyat dipadah kemari.

Menteri Pengerai Dr Dzulkefly Ahmad madahka kes HFMD di Malaysia, taja pia, enda semalat ba sekeda menua bukai baka di China ke ngerikod penyampau pemati ke pemadu mayuh ketegal penyakit nya.

“Nya meh kebuah lima batang pekara dikemerat baka chara nuchi jari ke betul, nyaga pemeresi ngelingi, tapis ba pintu penama premis enggau disinfeksi utai ke kamah dikena nyeliahka HFMD,” ku iya ba sesi Tanya Saut Menteri kemari.


Iya nyaut tanya ari Dr Kelvin Yii (DAP-Bandar Kuching) sentang penyampau kes HFMD di Sarawak sereta chara nyeliah nyengkaum kriteria ke dikena berati sekakika taska tauka tadika patut ditutup ketegal penyakit nya.

Di Sarawak, Dr Dzulkefly madahka bisi 6,209 kes HFMD dirikod enggau majoriti diripotka di Kuching, iya nya 1,387 kes dalam timpuh Jan 1 ngagai Ogos 14, 2018.

Ku iya premis taska, tadika, tabika tauka prasekula semina deka ditutup enti igi penyakit HFMD bidi ba endur nya.

Dzulkefly madahka kes HFMD deka diklasifikasi nyadi igi penyakit nyema bisi dua atau lebih kes di premis nya dalam timpuh inkubasi HFMD.”Pemutus nutup premis semina diambi dalam timpuh 10 hari ari haribulan kes HFMD ke ditemu ba premis ke sama. Premis reti nya bilik kelas alai kes nya ditemu,” ku iya.

Pemutus nutup nya ngabika ulih nagai kelekai penyakit nya ngagai bala nembiak mit bukai sereta ngambika pengempu premis nya ulih bejalaika proses munaska igi penyakit, kelebih agi ba ayam enggau utai bukai ke dirampit baka geladak enggau mija. — DayakDaily

RELATED ARTICLESMORE FROM AUTHOR