KUALA LUMPUR, Julai 20: Bisi 33,425 kes penyakit jari, kaki enggau mulut (HFMD) diriput di serata menua nyentuk kemari kelimpah Sabah enggau Sarawak ti bisi mandangka peniki dibanding enggau taun siti nyin kemari.
Ketuai Direktor Opis Pengerai, Datuk Dr Noor Hisham Abdullah madahka ba minggu ke-29 taun tu iya kemari, bisi 722 kes diriput lalu kena Hari Dua tu tadi 18 premis ditutup nyengkaum enam taska enggau 12 tadika.
“Semua penyampau premis ke ditutup nyentuk ke diatu bisi 419 premis iya nya 198 taska, 197 tadika enggau 23 buah sekula,” ku iya ba sebengkah penerang sehari tu.
HFMD nya penyakit ketegal dirampit virus, kelebih agi ari bansa Coxsackie A16 dan Enterovirus 71 (E71) ke berampit nengah chara betegu enggau ai ari idung, ai liur, lepuh enggau tai pengidap nya.
Dr Noor Hisham madah, opis menteri nya deka majak matau gaya HFMD enggau mensia mayuh dipinta semampai nitihka jaku tangkan ari opis bekuasa pengerai. — DayakDaily
