Bilik operasi khas PRU14 PDRM di serata menua diaktif

Royal Malaysia Police logo

KUALA LUMPUR, April 7: Bilik operasi khas Polis Diraja Malaysia (PDRM) di tetiap Indu Opis Polis Pelilih (IPD) enggau Indu Opis Polis Kontinjen (IPK) nyengkaum di Sabah enggau Sarawak berengkah ari tengah malam tu dikena napi Pengawa Bepilih Besai ke-14 (PRU14).

Pengarah Opis Pengelikun Dalam Negeri enggau Pengelikun Mensia Mayuh Bukit Aman, Datuk Seri Zulkifli Abdullah madahka pusat pengemata PDRM di Bukit Aman deka ngatur bantu neritka kuasa nyema bisi sebarang penusah nyadi.

Kelimpah ari nya, bilik operasi khas nya mega deka nyadi palanpemamsut pemadah ngagai mensia mayuhsentang tikas pengelikun menua, ku iya kemari.

Kui iya, bilik operasi khas polis deka matau sereta nyaga pengelikun nyerumba PRU14 pengudah Parlimen direrak berengkah ari tengah malam tu.

Ku iya pemesai enggau raban PDRM mega deka mantu Komiti Pengawa Bepilih Besai (SPR) nentuka pengelanchar proses PRU14.


“Penyendia PDRM mega nyengkaum ba hari ngantung nama chalun, ngundi enggau nangkanka nya,” ku iya.

Dulu ari nya, Kepala Polis Menua, Tan Sri Mohamad Fuzi Harun madahka PDRM udah sedia napi PRU14 nyengkaum raban tamb Sukarelawan Simpanan Polis (PVR) enti bisi pematut diguna.

Naka ke diatu ku iya, urung 79,000 raban tauka 69 peratus ari semua pemesai enggau raban PDRM ari bemacham opis enggau unit deka bisi kaul.

Ku iya, polis mega udah ngelala urung 1,100 individu enggau organisasi ke tau ngaga penyarut maya PRU14 kelimpah ngelala 116 kandang endur di Semenanjung enggau 33 di Sabah sereta Sarawak nyadi palan ‘angat’ maya PRU14.

Menteri Besai Datuk Seri Najib Tun Razak, kemari udah madahka Parlimen direrak berengkah ari sehari tu ngambika PRU14 ulih diatur diserata menua. — DayakDaily