Bida ba jalai pengarap enggau bansa ukai penekul rayat Sarawak idup likun — KM

Chief Minister Datuk Patinggi Abang Johari Tun Openg - file pic

KUCHING, Mei 31: Kepala Menteri Sarawak Datuk Patinggi Abang Johari Tun Openg madah, bida ari sukut jalai pengarap enggau bansa ukai nyadika penekul kami idup liku, pia ku iya ba jaku pesan Hari Gawai Dayak 2018.

Ku iya baru, bida enggau kuing politik mega enda patut nyadi sapat ti nyeraraka rayat di negeri tu.

Seraya meri “Selamat Ngintu Gawai” ngagai rayat bansa Dayak di Sarawak, Abang Johari madahka pengerami Gawai udah nyadi sebagi ari adat asal sereta pengerami ke beguna amat ngagai raban bansa Dayak.

Iya ngarapka bansa Dayak ngintu pengerami nya dalam pengerichah enggau pengelikun.

Abang Johari ngenang baru, sebedau Gawai Dayak nyadi pengerami rasmi dalam taun 1963, bansa Dayak ke idup betanam, ngintu bemacham bansa Gawai dalam sistem sosial sida.

Gawai Dayak mega nyadi hari endur ngenataika pengaga ati pengudah tembu musim ngetau.

Diatu Gawai Dayak beguna endar diintu kelalu nyadi pelasar negapka penyerakup lalu nyadi kelai ba pengidup bansa Dayak ti nadai tatak sereta pengelikun di negeri tu.

Taun tu ku Abang Johari, ba pengawa mantaika daya pengidup enggau tradisi Dayak, bansa Dayak deka ngatur pengawa bejalai bebala mayuh di Kuching kena Jun 22 ti diseretai beribu-ribu iku nyengkaum bansa Dayak ari menua sepiak.

Pengawa bejalai bebala mayuh sepenyauh 1.5 km nya deka tembu ba waterfront Kuching deka nyadi pengerami ke nyelai ti mandangka ngepan asal Dayak sereta disempulang enggau mantaika muzik enggau tanda.

“Selamat ngintu ari Gawai Dayak, gayu guru gerai nyamai lantang senang, nguan menoa…” ku iya. — DayakDaily