KUCHING, August 28: Presiden Parti Rakyat Sarawak (PRS) Tan Sri Dr James Jemut Masing madahka analogi Menteri Besai Tun Dr Mahathir Mohammad ti madahka bantu belanja nya baka “tungkat”, matak perati.
“Analogi Tun Mahathir ti madahka “tungkat” nya patur diambi pulai ari rayat ngambika sida ulih mansang sereta idup bediri ngatika diri nya matak perati.
“Dalam prinsip, nya chara ke chukup manah tang ba dunya nyata enda tau dikeandalka endar,” ku Masing madah nengah sebengkah penerang kemari.
Ku iya, Dr Mahathir patut meretika rayat ke ngena “tungkat” nya ukai pilih sida ang begunaka nya.
“Ukai pilih sida nyadi orang ke seranta, tang nya nyadi ketegal sekeda pekara lalu enda ulih diseliahka. Sida tu begunaka “tungkat” dikena ngidupka diri.
Ambika chunto Negeri Sarawak. Sarawak sebuah negeri ke pemadu seranta di Malaysia. Tebal agi penerima BR1M di Sarawak nya ari menua pesisir.
“Sida nadai peluang ari sukut penyambung, pelajar enggau utai bukai. Sida tu pekebun mit e betapi enggau mayuh bengkah penyakit ba pengawa betanam betupi, indu utai enggau gaya hari ke udah ulih dijangka,” ku Masing ke mega Sapit Kepala Menteri.
Kelimpah ari Sarawak, bisi sekeda negeri di Malaysia agi begunaka “tungkat” ari perintah besai dikena ngidupka diri.
“Lalu nya kebuah batang kebuah Polisi Ekonomi Baru tu ukai bantaika orang bukai Tun Mahathir empu dikena mantu orang serantau tauka ti enda benasit manah.
“Uji pulaika pengingat Malaya mega ngena “tungkat” ari Sarawak nyentuk ke nyadi baka ke sehari tu. Uji pikir nama nyadi nyema “tungkat”, minyak enggau gis ari Sarawak enda dikena ngaga Bangunan Begembar, Kompleks Intergrated Peteonas Pengerang, Universiti Teknoligi Petronas enggau ke bukai.
“Nya kebuah, Tun Dr Mahathir patut nemu berundingka sekeda negeri tauka rayat Malaysia mengkang begunaka “tungkat” dikena ngidupka diri. BR1M chuntk ke manah ke agi beguna,” ku Masing.
Iya mega madahka PRS nyukung polisi perintah Pakatan Harapan (PH) ti lurus agi ke deka mansik Bantu Rayat 1Malaysia (BR1M) ke bisi kaul enggah oekara makai suap.
Masing mansutka penemu munyi th nimbal penerang ti dipansutka empai lama ti madahka perintah PH deka belinsur ngurang lalu enda meri BR1M agi, laban menteri besai dekaka rayat enda bepanggai ba BR1M ke dikumbai iya “tungkat”. — DayakDaily
