KUCHING, Jun 18: UMNO tau ngerembaika sayap ke Sarawak tang empai temu parti ari Semenanjung nya diterima rayat Sarawak, ku siku penganalisis politik.
Prof Madya Dr Awang Azman Awang Pawi, Pensyarah Kanan, Universiti Malaya madah penumbuh UMNO di Sarawak ditulak maya jeman iring ex-Kepala Menteri Sarawak Tun Pehin Sri Abdul Taib Mahmud, Pehin Sri Adenan Satem lalu diatu Datuk Patinggi Abang Johari Tun Openg.
Ku iya udah bisi ‘gentleman agreement’ entara maya Taib enggau Tun Dr Mahathir Mohamad ti enda ngemendarka UMNO ditumbuh di Sarawak.
Ku iya, rambau nya mayuh pengundi menua pesisir enda ulih ngelengka sukung ngagai Barisan Nasional (BN) laban ke disukung sida ukai parti tang lebih ngagai logo BN.
Taja pia, ku iya landskap politik udah berubah pengudah Pengawa Beilih Besai Ke-14 (PRU14) lebuh Dr Mahathir udah ba sepiak Pakatan Harapan, lalu Taib enda agi aktif dalam bidang politik. — DayakDaily
