SRI AMAN, Mei 27: Kaban Kunsil Negeri Simanggang, Datuk Francis Harden Hollis ngelalau bansa Dayak ke ngintu pengerami Hari Gawai ngambika ngintu pengerami nya enggau pematut.
“Intu meh pengerami nya enggau pematut lalu anang bebasau belanja ke tau ngasuh kita rugi,
“Beli barang nitihka pengulih kita lalu kelalu balat bebasauka belanja nyentukka tau ngasuh kita rugi,” ku iya.
Harden bejaku munyi nya lebuh bejadi Pengerami Makai Lemai Mantar Gawai 2018 ke diatur JKKK Kpg Desa Indah, Sri Jaya ba Dewan Suarah ditu malam ensana.
Nengah awakka mega Harden ngelalau raban Komiti Pemansang enggau Pengelikun Genturung Pendiau (JKKK) regas nyingkang setipak enggau pemansang ke diatu.
Perintah negeri ngarapka kerejasama entara raban JKKK enggau ketuai menua tu rat ngambika ulih ngemansang kandang menua sisa, ku iya ke mega Menteri Muda Pengelantang Komuniti Sarawak.
Ku iya, nya ngambika pemansang ba genturung pendiau enggau rumah panjai di negeri tu sebaka enggau pemansang ke diatu.
Nengah awak nya mega Harden ngungkupka agih belanja ungkup taun 2019ngagai JKKK sepenyampau RM5,000 lalu RM3,000 ngagai Biro Indu.
Sama bisi ngulu pengerami nya Chairman JKKK Deniel Sidi, Chairman Biro Indu Rabecca Pandie enggau ke bukai. — DayakDaily
