Bayar khas Aidilfitri ngagai orang gawa perintah meseti dikemendarka ba Aum Parlimen

Cash. — DayakDaily.com file pic.// Photo: Pixabay

KUALA LUMPUR, Jun 9: Bayar Khas Aidilfitri ngagai orang gawa perintah ti dibantaika Menteri Besai Tun Dr Mahathir Mohamad meseti bisi pemendar ungkup belanja tambah ba aum Parlimen, Julai tu laban belanja nya nadai dalam ungkup dalam Bajet 2018.

Opis Menteri Wang madah, ungkup belanja ke dibantaika ex-menteri Datuk Seri Najib Tun Razak sebedau tu semina disebut iya aja.

“Bisi orang madahka ungkup belanja tambah ke dipinta nya udah disediaka dalam Bajet 2018 laban ex-Menteri Besai udah madahka bayar khas RM1,500 ngagai semua orang gawa perintah dalam Pejurai Bajet 2018 taun nyin radi, iya nya 27 Oktober 2017.

“Tang ke bendar, ungkup belanja ke dibantaika dikena mayar nya nadai disediaka dalam Bajet 2018. Pekara tu udah disahka Opis Akauntan Menua,” ku penerang nya sehari tu.

Surat Tesau Akauntan Menua Malaysia (SPANM) Bil. 5 Taun 2017 ke bekaul enggau pekara nya udah dikinsil lalu diganti enggau SPANM Bil 1 Taun 2018.

Akauntan Menua Datuk Saat Esa mega ngamatka ungkup belanja nya meseti dikemendarka dalam aum Parlimen kena Julai 2018 tu lalu nyadi Rang Undang-undang Perbekalan Tambahan 2018.

Kena Mei 30 tu tadi, Dr Mahathir bisi madahka deka meri bantu khas RM400 ngagai orang gawa perintah Gred 41 ke baruh enggau RM200 orang pinchin gawa perintah.

Menteri Wang Lim Guan Eng udah nya madahka bantu nya nguna belanja RM700 juta ke deka dipejurai nengah Rang Undang-Undang (RUU) Perbekalan Tambahan dalam Aum Parlimen Jun tu. — DayakDaily