Baru dipinta nyendia agih belanja besai ungkup kereja nyukat kelingi tanah NCR

Datu Len Talif Salleh - file pic

Dikarang Chris Bishop

KUCHING, April 30: Perintah Besai dipinta ngagihka belanja ke chukup ngambi tau dikena ngemujur pengawa nyukat kelingi Tanah Adat Bansa Asal (NCR).

Menteri Muda Perambu Negeri, Pengatur Tanah enggau Rampa Menua Datu Len Talif Salleh madah pengawa nyukat kelingi tanah NCR nengah Seksyen 18 begunaka enda kurang ari RM30 juta setaun.

Nitihka riput surat berita kena Mac 29, ku Len, ADUN Ba’Kelalan ke mega Menteri Kereja Raya Baru Bian madah Perintah Besai udah ngemendar agih belanja penyampau RM21.5 juta ungkup tuju nya.

“Ari semua penyampau nya, Perintah Negeri semina udah nerima RM10.75 juta aja.

“Nama kebuah diberi setengah aja lalu enda diberi abis? Ke amat RM21.5 juta nya enda umbas dikena ngemujur pengawa nyukat.

“Baru patut nentuka agih belanja ke besai diberi ngagai Sarawak ngambika mayuh agi tanah NCR ulih disukat lalu dikeluar surat pala tanah,” ku iya.

Len mansutka jaku nya ba sesi tanya enggau saut rambau Aum Dewan Undangan Negeri (DUN) Ke-18 di Komplek DUN ditu, seharitu.

Iya nyaut tanya tambah ari Kaban Kunsil Negeri (ADUN) Tamin, Christopher Gira ti deka nemu penyampau agih belanja ari Perintah Besai dikena ngemujur pengawa nyukat kelingi tanah NCR.

Ngenang kaul ke sama, Len ke mega ADUN Kuala Rajang madah Perintah Negeri ba taun 2019 udah ngagihka RM40 juta ungkup tuju ke sama.

Ku iya, agih belanja nya ukai semina ungkup kereja nyukat kelingi tanah NCR nengah Seksyen 18 aja tang mega nyerangkum pengawa nyukat kelingi nengah Seksyen 6.

“Dikena ngemujur pengawa nyukat kelingi tanah NCR, kitai udah ngambi 467 iku pemesai baru lalu sida tu dibagi ngagai 40 tim alai pengawa tu begunaka RM30 juta setaun,ku iya.

Nyaut tanya Gira sentang penyampau tanah NCR ke udah disukat, iya madah naka Mac 31, 2019 pemesai 87,554 hektar di kandang DUN Tamin udah dikemendar disukat nengah Program Sukat Tanah NCR Inisiatif Baru.

Ari penyampau nya Len, 86,567 hektar udah tembu disukat kelingi.

“Empat kandang endur di DUN Tamin tauka 37,626 hektar udah dikemendar disukat lot kediri nengah program tu alai 1,531 hektar udah tembu disukat sereta diberi lot,” ku Len. — DayakDaily