Abdul Rahman Ismail: Lapan CPPC digaga di serata negeri taun 2019

The Sarawak Legislative Assembly (DUN) complex as seen from across the Sarawak River, Kuching. — DayakDaily.com file pic

Dikarang Chris Bishop

KUCHING, April 30: Perintah Negeri udah ngemendar pengawa ngaga 8 Palan Ngumpul, Proses enggau Mungkus(CPPC) asil betanam betupi di Sarawak.

Menteri Muda Betanam Betupi Dr Abdul Rahman Ismail madah CPPC nya deka disikap enggau infrastruktur ke chukup ngambi ulih bejalaika pengawa dagang.

“Perintah Negeri merambu numbuhka CPPC ba kandang endur ke engkeman di serata negeri.

“Palan deka ngumpul, proses lalu mungkus asil betanam betupi ngambi tau dijual kelebih agi ba makit ekspot,” ku iya.

Abdul Rahman mansutka penerang nya rambau nyaut tanya Kaban Kunsil Negeri (ADUN) Bukit Begunan Datuk Mong Dagang ba Aum Dewan Undangan Negeri(DUN) Ke-18 di Komplek DUN ditu, seharitu.

Ku iya, tetiap CPPC nya deka diintu piak kompeni pribit ke ngembuan peneleba kelimpah ti udah bisi makit endur ngelaku asil betanam betupi.

“Nengah konsep tu, tetiap CPPC deka ngumpul sereta meli asil betanam betupi ari orang bekebun.

“Tu seraris enggau pengeran Perintah Negeri ngepunka pengawa betanam betupi ti tau nangkup pinta makit maya ke diatu,’ku iya.

Lapan CPPC iya nya Tarat di Serian, Layar enggau Spaoh di Betong, Lawas, Limbang, Sadong Jaya (Samarahan), Long Lama(Miri) enggau Sungai Baji di Sarikei.

Nitihka penerang Abdul Rahman CPPC di Tarat diatu benung digaga alai 7 ke bukai benung ba renggat nyendiaka pelin sereta tinda.

Kuntrek ngaga CPPC ku iya disandang dikeluar ba taun tu.

Abdul Rahman nambah, atur numbuhka siti CPPC begunaka belanja entara RM500,000 nyentuk ngagai RM10 juta.

Nyaut tanya bukai ari Mong, ADUN Bukit Kota nya madah bedau bisi perambu numbuhka CPPC di Bukit Begunan naka ke diatu. — DayakDaily