KUALA LUMPUR: Orang betupi, betanam enggau berikan patut mantu perintah ngerintaika pengaya baru dalam sektor betanam betupi ti tau meri penguntung ke besai.
Menteri Betanam Industri Betupi enggau enggau Orang Bumai, Datuk Seri Ahmad Shabery Cheek, madah nya ngambika sida ulih beratika dagang baru ti ulih muka peluang makit ke besai agi.
“Sapa bisi mikir jagung tau bisi peminta ke tinggi ari kompeni ngaga pemakai jelu. Kitai semina ngimport jagung 3.2 bilion tan setaun.
“Ambika chunto ikan patin pemadu tusah dijual, tang diatu udah bisi makit sereta meri pengaya ngagai orang ti ngemeranka nya,” ku iya.
Iya madah munyi nya lebuh ke bejaku ba pengerami ngelancharka Konvensyen Peladang, Orang Betupi enggau Berikan Menua (KPPNK) 2017, ditu malam tadi.
Sama bisi datai, Chairman Lembaga Kemajuan Ikan Malaysia (LKIM), Datuk Seri Dr Irmohizam Ibrahim.
Iya arapka konvensyen nya ulih mantu perintah ngaga polisi enggau chara baru ti nadai kala mansa runding sebedau tu.
Ku iya, nya beguna dikena perintah nyeliahka menua ari majak bepanggai ba sektor betanam betupi tradisional sereta ngiga peluang makit baru.
“Ambika chunto, perintah menua China beranakka puku di Malaysia laban pechaya puku ti diperanak ulih diambi pulai.
Perintah udah nyain siti sempekat enggau perintah menua China ngambika mekal buah nanas baru sepenyampau 500 tan. Nya asil penemuai Menteri Besai Datuk Seri Najib Razak ke menua nya bedau lama udah,” ku iya.
