SIBU, Jan 28: Presiden United People’s Parti (UPP), Dato Sri Wong Soon Koh minta rayat kelebih agi bansa Cina bekerejasama enggau komuniti Bumiputera nempa penyerakup ke Negeri Sarawak.
Ku iya, pekara nya beguna amat laban diatu negeri ari baruh iring siku Kepala Menteri enggau Menteri Besai ke mayuh penau ari baruh payung Barisan Nasional (BN).
“Ukai pekara ke nyelai laban kitai diatu sebagi ari Barisan Nasional. Kenyau ari hari keterubah, kitai udah gawa ari baruh payung Barisan Nasional lalu kitai mega sebagi ari Barisan Nasional.
“Kitai nyukung menteri besai enggau kepala menteri ke pemaik Negeri Sarawak enggau Malaysia,” ku iya.
Iya bejaku munyi nya lebuh ti ngelancharka website E-Rejista UPP di sebuah hotel ditu kemari.
Wong ke mega Menteri Wang Kedua enggau E-Dagang madah, parti nya udah nganjung rintai nama chulun dikena napi Pengawa Bepilih Besai (PRU14) ke deka datai tu.
Dua iku nama chalun ti keandal ulih menang ba sitak Sibu enggau Lanang nya, iya nya Dato Andrew Wong enggau Andrew Ting.
“Aku udah berandau enggau Menteri Besai Datuk Seri Najib Tun Razak sereta Kepala Menteri Datuk Patinggi Abang Johari Tun Openg lalu nyuaka nama chalun ke dikeandalka ulih menang,” ku iya.
Iya mega madahka seduai nya udah nempa Pelin Sibu 1 (RS1) ke mega perambu pemansang ungkup menua Sibu ungkup timpuh lima taun ti mungkur semua sukut pemansang.
“RS1 ke bendar pelin rayat, begulai enggau rayat sereta ungkup rayat Sibu. Tu ungkup pemansang Sibu lalu pemansang tu deka dipejalai sereta nyadika malin ngagai jemah ila ari taun 2018 ngagai 2022,” ku iya.
Sama bisi ngulu pengerami nya kemari,mandal kanan Presiden UPP Datuk Tiong Thai King, Ketuai Nembiak Pusat ke mega mandal presiden Dr Johnical Rayong enggau sekretari besai George Lo. — DayakDaily
