Bank Darah Sepital Sibu suntuk bekal darah

Blood donation. — DayakDaily.com file pic. // Photo: Pixabay

SIBU, Jan 12: Ketegal suntuk bekal darah, Bank Darah Sepital Sibu muka kaunter kimpin meri darah di Delta Mall, Jalai Pedada sehari tu endur ngulihka bekal darah.

Penulung pemesai Pemadah Bank Darah Sepital Sibu, Lily Sinta madahka kaunter nya dibuka ari jam 3 lemai nyentuk 8 malam ngagai mensia mayuh ngambika datai meri darah.

“Tuju kaunter kimpin darah dibuka laban deka ngulihka naka pemayuh bekal darah dikena nampung guna darah di Sepital Sibu ke benung suntuk bekal nya diatu.

“Kami begunaka sukung ari mensia mayuh dikena nentuka Bank Darah bisi bekal ke chukup dikena ngubat pesakit,” ku iya.

Berebak enggau nya, Opis Kimia mega bisi ngatur kimpin meri darah ba hari ke sama ba Bank Darah Sibu belabuh jam 9 pagi nyentuk 11 pagi.


Pagila, Gerempung Juruteknik Kerita Sibu (SARA) mega deka ngatur kimpin meri darah ba opis begunan gerempung nya di Sungai Antu ari jam 9 nyentuk 12.30 tengahari.

Kelab Lion Sibu Jaya,Gerempung Klan Phang enggau Gerempung Klan Yii mega sama bisi ngatur kimpin meri darah ba Mega Mall, Orange Zone jam 9 pagi nyentuk 2 ngalihari.

“Kami minta mensia mayuh datai nyukung ke pemaik pesakit ti begunaka nya.

“Saup pemeri darah nya beguna amat ba kami,” ku iya.

Penerang silik pasal pekara tu tau ditanya ngagai Bank Darah Sepital Sibu nengah lumur 084- 238802. — DayakDaily